2003 жылдан бері 56 жастағы М.К.Ш Қазақстанда жеке басын куәландыратын құжатсыз өмір сүріп келген. Қырғыз әйелі елге оралды, деп хабарлады 30 наурызда Қырғызстан сыртқы істер министрлігінің баспасөз қызметі.
«Қырғызстанның шетелдегі елшіліктері азаматтардың өтініштерін тыңдап, олардың құқықтары мен мүдделерін қорғауға тырысады», — деп жазылған СІМ таратқан ақпаратта.
Министрлік мәліметінше, Қырғызстанның Алматыдағы бас консулдығы мен «Жаш Муун» диаспорасының өкілдері 1967 жылы туған М.К.Ш. есімді азаматты Қырғызстанға қайтаруға көмектесті. Ол Қазақстанда қиын жағдайға тап болып, 2003 жылдан бері құжатсыз өмір сүрген. Әйелмен бірге оның 2008 жылы туған Ж.А.Э. есімді кәмелет жасқа болмаған баласы да елге қайтты.
Қырғызстан мемлекеттік көші-қон қызметінің мәліметінше, Қазақстанда тіркеусіз өмір сүрген қырғызстандықтарды құлдыққа алу оқиғалары кездескен.
Тәуелсіз құқық қорғау ұйымдарының зерттеуіне қарағанда, құлдыққа тап болған қырғызстандықтардың 70 пайызы — еңбек мигранты.