Қырғызстан ішкі істер министрі Ұлан Ниязбеков журналист-зерттеуші, Temirov LIVE youTube-арнасының негізін қалаушы Болот Теміров пен оның әріптесі, ақын Болот Назаровтың істерін түсіндірді.
Министрдің айтуынша, ішкі істер органдарына «Болот есімді азамат 2021 жылғы 25 қазаннан бері есірткі қолданады, достарын да соған үгіттеп жүр» деген арыз түскен.
Temirov LIVE редакциясының кеңсесін тінту осы арыз негізінде жүзеге асты, деп түсіндірді Ұлан Ниязбеков. Оның айтуынша, тексеру кезінде Болот Теміровтің қалтасынан гашиш шықты. Болот Назаровты ұстау кезінде одан 14 грамм гашиш табылды.
«Біз қоғамға танымал азаматтардан бұндайды күтпедік. Бірақ болар іс болды. Сараптамалар жасалды, тергеу заң аясында әділ жүргізіледі, оны жеке өзім бақылаймын», – деді ІІМ басшысы. Ол сараптама қорытындысына сүйенгенін ескертті.
Министрдің айтуынша, екі күдіктінің үстінен «есірткі заттарын заңсыз дайындау» бабы негізінде қылмыстық іс қозғалды.
Еске салайық, Болот Теміров 22 қаңтарда кешке ұсталды. Ертесіне ақын Болот Назаровтың ұсталғаны мәлім болды. Сол күні кешке оларды үйқамаққа ауыстырды.