9 шілде кешкісін Астана қаласында «Яндекстің» ондаған курьері еңбек шарттарын жақсарту талабымен наразылық білдірді. Акция кезінде тартылған видеотаспа әлеуметтік желілерде жарияланды.
Астана қалалық полиция департаменті хабарласқандай, курьерлер алғаш ЕХPО аймағына жиналып, кейін мопедтерімен «Қазақстандық күн» монументіне қарай жүрді.
«Олар жол бойында полиция қызметкерлері тарапынан тоқтатылды. Одан кейін Есіл аудандық полиция бөлімшесіне жеткізіліп, жол ережесін бұзғаны үшін жауапкершілікке тартылды», — деп жазылған департамент мәлімдемесінде.
Әзірге курьерлердің талаптары орындалған-орындалмағаны туралы мәлімет жоқ.
Соңғы жылдары Алматы қаласындағы жеткізу қызметтерінің курьерлері еңбек шарттарын жақсарту талабымен бірнеше рет наразылық білдірген. Бірқатар жағдайда жұмыс берушілер олардың талаптарын орындаған.
