Дүниежүзілік банктің атқарушы директорлар кеңесі 7 маусымда Украинаға 1,49 миллиард доллар қосымша көмек бөлу туралы шешім қабылдады. Қаражат «Украинаның әкімшілік әлеуетін сақтауға қажетті мемлекеттік шығындар» жобасы аясында бөлінеді.
Жоба қаражаты соғыстан тыс шығындарға жұмсалады. Соның есебінен мемлекеттік және әлеуметтік жұмысшылардың жалақысы төленеді.
Шамамен 1,5 миллиард доллар Дүниежүзілік банктің Украинаға төрт миллиард доллар көлеміндегі көмегінің бір бөлігі.
Жобаны Ұлыбритания, Нидерланд, Литва мен Латвия, сонымен бірге Италия мен Дания қаржыландырды.
«Дүниежүзілік банк тобы Украина мен оның халқын соғыс кезінде қолдау үшін шұғыл шаралар қабылдай береді», — деді Дүниежүзілік банк тобының президенті Дэвид Малпасс.
Дүниежүзілік банк Украинаның ішкі жалпы өнімі 2022 жылы 45 пайызға төмендейді деп болжады. Ресейдің Украинаға басып кіруі украин өнеркәсіп секторын тұралатып тастады, инфрақұрылым бұзылды, халық саны күрт азайды.
Ресей шабуылынан соң енгізілген санкциялар, шетел компанияларының бұл елден жаппай кетуі Ресей экономикасына соққы болып тиді, алайда үкімет энергия ресурстары экспортынан түскен табыспен бюджет шығындарын өтеп отыр. Сарапшылар Ресей экономикасы 2022 жылы 8,9 пайызға төмендейді деп болжады.
Бұл уақытта, Украинадағы соғыс ғаламдық экономикаға да кері әсер етіп отыр. Дүниежүзілік банк әлемнің экономикалық өсіміне жасаған болжамын 1,2 пайызға дейін төмендетті.