Бауыржан Байбек. Фото: nur.kz
Пәтер кілтін табыстау үшін ұйымдастырылған арнайы шара барысында баспаналы болған Жұлдыз есімді бойжеткен өз қуанышын орыс тілінде жеткізген болатын. Сол сәтте Алматы қаласының әкімі Бауыржан Байбек Жұлдыздан қазақ тілінде сұрады:
– Алматыда тұрасың ба?
– Иә, тәтеммен бірге тұрамын.
– Қай жақтан келдің?
– Қызылордадан келгенмін екі жыл бұрын.
Алматының әкімі қазақша сөйлеп тұрғасын, 99 пайыз қазақ тұратын Қызылордадан келген Жұлдыз ұялып қалған секілді, тілі бұл жолы қазақша шықты…
– Қайда істейсің?
– Банкте.
– Пәтерің құтты болсын! Бірақ қазақ тілінде сөйлеу керек. Барлық кезде қазақ тілінде сөйлеп үйреніңдер.
Қысылып қалған Жұлдыз «жарайды» деп келісімін берді.
Алаңға жиналған елдің бәрі Бауыржан Байбекке қатты риза болып, қуана қол соққан.