Көрнекі фото: www.tvc.ru
Тәжікстанда Хатлон облысының прокуратурасы судьяға балтамен шабуыл жасаған Диловар Олимовке қатысты қылмыстық іс қозғады. Айыпталушының ісі дәлелденсе, 8 жылдан 18 жылға дейін сотталуы мүмкін.
Бұл туралы Centralasian.org хабарлайды.
Оқиға 31 тамыз күні кешкісін Панжы аудандық сотының ғимаратында болды. Диловар Олимов аудандық соттың судьясы Давлатманд Рахимзоданың кабинетіне кіріп, балтамен шабуылдаған.
Судья жараланып, ауруханаға жеткізілді. Оның кабинетіндегі барлық жиһаз құртылыпты.
Бір тәулік өткеннен кейін Диловар Олимов ұсталған. Ол өзінің айыбын мойындағанымен «судьяны өлтіремін деген ойымда болған жоқ», — дейді.
Сол күні 31 тамызда Панжы аудандық сотында Олимовтың бұрынғы әйелінің шағымы қаралды.
Судья одан туған балаларын мойындамай келген Олимовке екі баланың әрбіріне ай сайын алимент төлеп тұруды міндеттеген. Сот шешіміне ашуланған айыпталушы ғимаратқа балта ұстап кіріпті.