Кремль баспасөз хатшысы Дмитрий Песков Ресейдің мәдениет және саяси элита өкілдеріне Украинаға қарсы соғыс ұзаққа созылады деп ескерткен. Бұл жөнінде The Guardian басылымы дереккөзіне сілтеме жасап хабарлады.
Онда Песковтың былтыр жылдың аяғында жоғары лауазымды шенеуніктің үйіндегі кешкі ас кезінде ескерткені айтылған.
«Сіздер менен не айтатынымды күтіп отырсыздар ғой. Бәрі ауыр болады, өте ұзаққа созылады», — деген Песков жиналғандарға. Ол бұл сөздерді дастархан үстінде тост сөйлеп жатып айтқан.
«Оның сөздерін есту оңай болған жоқ. Ол соғыс бізбен ұзаққа қалатынын, оған дайын болуымыз керек екенін ескертті», — деген The Guardian басылымына айтқан кешке қатысушы адамның бірі.