Өзбекстандағы Украина елшілігі елдің мәдениет және туризм министрінің орынбасары Баходир Ахмедовтің күзде ресейлік әнші Григорий Лепстің Ташкентте жоспарланған концертіне қатысты мәлімдемесіне пікір білдірді.
«Соғысты қолдайтын ресейлік әртістердің Өзбекстанда өнер көрсетуі елдің беделіне нұқсан келтіреді, қылмыстық әлемге қолдау көрсету болып саналады. Бұдан бөлек концерттерден түскен қаражат соғысты, террорзизмді қаржыландыруға жұмсалады», — делінген дипломатиялық миссия мәлімдемесінде.
Ресейлік әнші Григорий Лепс Ресейдің Украинаға басып кіруін қолдайды. 3 шілдеде ол Батыс елдері Украинаға берген Leopard танкілерін қирату үшін орыс әскеріне 1 млн рубль берген. Өзбекстандағы белсенділер Лепстің концертіне тыйым салуды талап етіп жатыр.
Kun.uz сайты бұл жөнінде елдің мәдениет және туризм министрінің орынбасары Баходир Ахмедовпен сөйлескен. «Ол бәрін шектеуге болады, бірақ өнер – шекарасыз сала, Өзбекстанда өнерге шектеу жоқ» деп жауап берген.