KAZAKBOL.COM
Желіде 1990 жылдары Германияға көшіп кеткен қарағандылық ұлты неміс әжейдің қазақша бата беріп отырған видеосы тарады. Желі қолданушылары қазақшаға тілі жатық қарияның бата беруіне таңғалған, деп жазады KAZ.NUR.KZ.
Желіде «неміс апаның» дастархан басында қазақша бата беріп отырған видеосы қызу талқыланды. Видео сипаттамасында белгісіз әйелдің 90 жылдары Қарағанды облысынан Германияға қоныс аударған неміс ұлтының өкілі екені айтылады. Жеті шелпек пен бауырсаққа толы қазақ дастарханында отырған көпшілік неміс әжейдің батасын ұйып тыңдап, қол жаяды.
«Пайғамбардың бағын берсін,
Сүлейменнің тағын берсін!
Бақ бағып жүрсін,
Қыдыр дарып жүрсін!
Құдайым әр пәледен қағып жүрсін!
Похожие статьи
Өліге иман, тіріге береке берсін!
Екі дүниенің абыройын берсін!
Қай-қайсының отбасына Алланың берер жақсылығы таусылмасын! Бақытты болыңдар, қарақтарым! Аллаһу акбар!», — дейді неміс әжей.
Желі қолданушылары қазақшаға тілі жатық қарияның бата беруіне таңғалған.
«Мына видеода 1990 жылдары Қарағанды облысы, Шет ауданынан Германияға көшкен неміс апамыздың бата беруіне таң қалып отырмын. Тілді қалай меңгерген десейші. Мұндай бата бере алатын ақсақалдар өзімізде де аз қалды. Заман солай ма, адам солай ма белгісіз», — дейді видеоны парақшасында бөліскен блогер Бауыржан Серікбаев.
Басқа желі қолданушылары да «неміс апаға» риза болғандарын жазды. Олар тілді өте жоғары деңгейде меңгеріп қана қоймай, сонша жыл өтсе де дәстүрді ұмытпаған өзге ұлт өкіліне таңдай қағуда.
«Текті халық қой. Солтүстік өңірде тұрса да қазақша білетін талайын көрдік. Әлде тіл үйрену қабілеттері мықты?!», » Ақадырда осындай неміс көршілеріміз болып еді. Қандай адал жандар еді», — дейді желі қолданушылары.
KAZAKBOL.COM
