Қаланың қақ ортасында орналасқан қауіпті үйде өлместің күйін кешкендеріне осымен төртінші күн.
Алматыда төрт отбасы өртенген шатырсыз үйдің ішінде өмір сүріп жатыр. Кез-келген сәтте төбенің құлап түсуі мүмкін екенін білсе де, кішкене балалары бар ата-аналар басқа барар жеріміз жоқ деп отыр. Бұл туралы Алматы арнасы хабарлайды.
Тірлікке тұтынатын тұрмыстық техникаларының несиелік теңгесін төлеп болмай жатып барынан айырылған тек Әбілбектің отбасы ғана емес. Айналымға келмейтін 60 шаршы метр жерде 6 жанұя жан сақтап келген. Өрттен аман қалған адамдар жалын тимеседе, күйе жағылған жарамды дүниелерін жинап жүр.
Үстеріндегі ескі киімдерден басқа заттарының бәрі түк қалмай жанып кеткен төрт жанұяның осында түнеп жүргендеріне төртінші күн. Өрттен соң екі отбасы көшіп кеткен. Күлімсі иіс, қара күйеге айналған үй қазір қауіпті орынға айналып, ескі баспананың сылағы да сылынып түсіп жатыр. Бірақ қатерлі болғанына қарамастан қаршадай балалар кіріп-шығып жүр.
Жалдамалы пәтерде жан сақтап отырған жанұялардың барлығы аула сыпырумен айналысып, мардымсыз жалақымен жан сақтап келген. Айналадағы адам төзгісіз ахуалды көрген аудан басшылары құрылыс материалдарын алып береміз деді.
Санитарлық тазалық сақталмаған, қоқысқа толы тар ауладағы әр жанұядан үйдің қожайыны ай сайын 25-30 мың теңгеден ақы алып отырған. Қожайынды іздегенмен әкімдіктегілерде таба алмады. Ескі үйден еселеп пайда тауып отырған түркиялық бизнесменнің салықтық құжаттары тексеріліп жатыр.