«Банкуотч»: Өзбекстанда коронавируспен күреске бөлінген қаражатты мақсатсыз жұмсаған

Bankwatch Network желісінің мәліметінше, Өзбекстан үкіметі коронавирус пандемиясымен күреске бөлінген қаражатты басқа мақсаттарға жұмсаған.

Ұйым осы мәселені көтерген блогердің соққыға жығылғанын атап өтті.

Пандемия басталған уақытта халықаралық қаржи интитуттары Өзбекстанның дағдарысқа қарсы қорына қаражат бөлді. Мәселен Азия даму банкі 600 миллион доллардан астам займ берді.

Bankwatch Network үйлестірушісі Нина Лесихинаның айтуынша, Өзбекстанда қаражаттың қалай жұмсалғаны жарияланбайтындықтан, коронавируспен күреске бөлінген ақшаның қайда кеткенін анықтау қиын. Алайда ол бұл салада жемқорлыққа жол беретін үрдістер барын байқаған.

«Мәселен, Өзбекстан президенті Шавкат Мирзияев пен Ташкент басшысы Жахонгин Артықхожаевқа қатысы бар делінетін үш компания медициналық мекемелердің құрылыстарын салу жөніндегі келісім-шарттар алды. Олар: Enter Engineering, “Обод шахар куриш” және “Узтемирйулкурилишмонтаж”.

Бұл жобаларды жүзеге асыруға тендер өтпегендіктен, тәуелсіз басылымдар оның ашықтығына күмәнданады», — дейді Лесихина.

Дағдарысқа қарсы қор 2020 жылғы 19 наурызда Өзбекстан президенті Шавкат Мирзияевтің жарлығымен құрылды. Сырттан алынған 1 миллирд доллар несиеден 10 триллион сум ($932 млн) осы қорға аударылды.

Бұның алдында Өзбекстанның қаржы министрлігі 2021 жылғы сәуірде республиканың сыртқы қарызы 23,2 миллиард доллар екенін хабарлаған. Бұл — республиканың Жалпы ішкі өнімінің 40,1 пайызы.

Источник