KAZAKBOL.COM
Түркістан облысы Мақтарал ауданындағы Фирдауси ауылында биліктің талабымен мектепке оқушы қыздарды орамалмен кіргізбеген Фирдауси мектебінің директоры Жанар Мамыроваға қоқан-лоқы жасалды.
Жанар Мамырованың айтуынша, жаңа оқу жылынан бастап министрдің бұйрығымен оқушы қыздарды орамалмен мектепке кіргізбегені үшін өзіне кейбір ауыл тұрғындары қоқан-лоқы көрсеткен. «Мені оқушы қыздарға орамалын шешкізгенім үшін айыптайды. Ұялы телефоныма белгісіз нөмірлерден орамалды шешкізгенің үшін атып кетеміз деген xаттар түскен соң полицияға арыздандым» дейді директор.
Жанар Мамырованың Мақтарал аудандық ішкі істер бөліміне арыз түсіргенін облыстық ішкі істер департаментінің баспасөз xатшысы Салтанат Қаракөзова растады. Оның сөзінше, арызға сәйкес Қылмыстық Кодекстің «қорқыту» бабы бойынша іс қозғалған. Сотқа дейінгі тергеу амалдары жүргізіліп жатыр.
Фирдауси атындағы мектепте орамалын шешуден бас тартқан оқушы қыздарды қолдап, мектеп алдында наразылық білдірген сегіз ата-ана бұған дейін әкімшілік жауапқа тартылған. Әртүрлі себеппен 15 оқушы басқа мектептерге ауысқан.
Қыркүйектің 6-сы күні Фирдауси ауылында мектепке орамалын шешіп баруда бас тартқан 13 оқушы қыздың ата-анасына бес айлық есептік көрсеткішке (бір айлық есептік көрсеткіш — 2405 теңге) тең айыппұл салынған.
Фирдаусидегі орамал дауы білім және ғылым министрлігінің 2016 жылы қаңтарда шығарған бірыңғай мектеп формасы ережесі туралы №26 бұйрығынан кейін туындай бастаған. Құжатта мектепте қандай да бір дінді насихаттайтын киім киюге тыйым салынған. Билік бұйрықтың орындалуын талап етсе, ата-аналар дәстүрді алға тартып, қыздарының мектепке орамалсыз баруына қарсы шығады.
Министрлік бұйрығы былтыр күзде Ақтөбе, Батыс Қазақстан және Маңғыстау облыстарында да кейбір мектеп әкімшілігі мен ата-ана арасындағы «орамал дауына» себепші болған. Аталған аймақтарда мектеп әкімшілігі сабаққа кіргізбей қойған ондаған оқушының ата-анасы сотқа арыз берген. Тұрғындар шағымын қараған соттар Білім және ғылым министрлігі мен мектептің ұстанымын қолдаған.
KAZAKBOL.COM
