Киев бейсенбіде Донбаста ондаған оқ атылғанын мәлімдеді

17 ақпаннан бастап Донбаста жағдай ушыға түсті. Украина қорғаныс министрі Алексей Резников аймақтағы оқ атуларды әдейі арандату деп атады. Министр жікшілдер Ресейдің қолдауымен істеп отыр дейді.

Резниковтың айтуынша, Мәскеу Украинаға қарсы агрессиясын күшейту үшін ақпараттық компанияны көбейтіп жатыр. Ол оқ атулар қарапайым тұрғындарға, оның ішінде балаларға үрей әкеп жатқанын айтты.

Украинаның шығысындағы жікшілдер болса, бейсенбіге қараған түні украин армиясы Донецк пен Луганск аймақтарында оқ атуды күшейтті деп мәлімдеді. Ақпаратқа қарағанда, оқтан Донецк шетінде бір әйел жарақат алған.

Украина билігі болса, бейсенбіде Донецк пен Луганск облыстарындағы жікшілдер тарабынан 50-дей оқ атылғанын хабарлады.

Киев атап өткендей, атыс кезінде инфрақұрылымдарға, оның ішінде балабақшаға оқ тиген. Арасында жараланғандар бар.

Аймақта ахуал АҚШ пен НАТО Ресей Украинаға шабуыл жасауы мүмкін екені жарияланған кезде болып жатыр.

Источник