Қырғызстан ішкі істер министрлігінің мәліметінше, Мәскеу қаласы мен Мәскеу облысы аумағында ұйымдасқан қылмыстық топ ақша бопсалаумен, кәсіпке бақылау орнатумен айналысқан.
Бұл топты Нарын облысында 1988 жылы туған А.А. есімді азамат басқарады. Оның лақап аты — Қарагер. Бұрын кісі өлтіру, қарақшылық, бұзақылық, алаяқтық қылмыстары бойынша сотталған. Қырғызстан ішкі істер министрлігінің есебінде ол ұйымдасқан қылмыстық топтың белсенді өкілі деп тіркелген.
10 маусымда Қырғызстан ішкі істер министрлігінің Мәскеудегі өкілдігіне келген бір қырғызстандық 32 жастағы туысын ұрлап әкеткенін айтқан. Кейін жәбірленуші жалға алынған пәтерлердің бірінен табылған. Қылмыскерлер оның туыстарынан 1 млн 800 мың рубль талап еткен.
Қылмысқа қатысы бар деген күдікпен Қырғызстанның сегіз тумасы ұсталды. Олардың арасында ұйымдасқан қылмыстық топ жетекшісі Қарагер де бар. Ұсталғандардың үстінен қылмыстық іс қозғалды.