Оқыған, жұмысы бар қазақ қыздары неге теңін таппай отыр?

Динара. Жасы 32-де. Өзін «кәрі қыздар» санатына қосудан аулақ. Керісінше, өзін «тартымды» қалындықпын деп санайды. Жеке кәсібі бар. Соның жемісін көріп, «не кием, не ішем дегенге» басы қатып уайымдамайды.

«Мен жаспын, әдемімін. Жоғары білімім, тұрақты жұмысым бар. Ата-анама масыл емеспін. Тіршілік етіп, өз-өзімді қамтып отырмын. Ауқатты демеуші не болмаса ақшалы жігітім де жоқ. Өміріме ризамын. Осы күнге дейін тұрмыс құрмауымның себебі – өзіме сай адамды кездестірмедім. Шыны керек, қазіргі жігіттердің көбі «бала» сияқты. Жауапкершіліктен жұрдай. Ыңғайы келсе бәрін әйелдің мойнына жүктеп қойғысы келеді. Ондай жігіттің қажеті қанша?!

Қазақтың мақалымен айтатын болсақ, «отырған қыз орнын табады». Ол жағына мен қам жемеймін. Ата-анам маған ол туралы ештеңе айтпайды. Олар менің нені қалайтынымды біледі, қандай ер адамды. Сондықтан, менің өмірімді түрткілемейді», — дейді Динара.

Шымкенттік бойжеткен Майраның да жасы отыздан асқан. Мұғалім болып жұмыс істейді. Ұжымда беделді. Жазда мемлекеттік-жергілікті басқару мамандығы бойынша екінші дипломын алмақ. Табиғатынан момын, өте қарапайым, әрі ұялшақ.

«Таңдау деген негізі менде болған жоқ, материалдық жағынан. Ол жағынан тіпті іздеген де жоқпын. Ойымда да болған жоқ ол нәрсе. Тек ой-өрісі өзіммен деңгейлес адам болғанын қаладым. Бірақ сол жағынан көп менде кедергілер болды. Қазіргі жігіттердің ойлау деңгейінің, өмірге деген көзқарасының төмендігі, олардың жұмыс мәселесінде жалқаулығы, осы мәселе көңілімнен шыққан жоқ, шынын айтқанда«, — дейді Майра.

«Таңдаған тазға жолығады» дегенді Майра жақсы біледі. Жалғыздық құдайға ғана жарасқан, ұсыныс түссе, шыға салам, деп шорт кескен кездері де болыпты. Бірақ, көзқарасы мен өмірлік ұстанымы сәйкеспеген жанмен тағдырын қосу қателік екенін түсінген.

«Үмітім бар енді. Жалғыз болып қалғым келмейді шын мәнінде. Өзімнің отбасым, балаларым болғанын қалаймын. Дәл қазір мендегі уайым осы бала мәселесі. Егер кеш шығып қалсам әйелдің бақыты, болашағы бәрі осы баламен байланысты ғой, тек осы жағы мені шын мәнінде қатты толғандырады», — дейді Майра.

Ләззат Сейілханды оралдықтар жақсы біледі. Туған күн, құдалық, үйлену тойы, сүндет той мен мерейтойлар оның «Жұлдыз-шоу» тобынсыз өтпейді. Қазақтың тойы бітсін бе, бойжеткен әр күн дерлік той-томалаққа барады. Есептеп көрсек, бір тойда кемінде 200 адам болса, Ләззат аптасына 2000 адаммен бет көріседі екен. Бірақ осынша жұрттың ішінен өзінің бағын ашып, өмірлік серігі болатын нар жігітті таба алмай жүр. Жасы 31-ге келсе де, тұрмыс құруға асықпайды. Айтуынша, бұған ер азаматтардың өздері кінәлі.

«Көп жігіт сөз салғанда қайда жұмыс істейсің? Айлығың қанша? Көлігің бар ма? Үйің ба ма? Соған қарағанда мен ойлаймын, жағдайы бар қыздарды ұнататын сияқты қазіргі жігіттер«, — дейді Ләззат Сейілхан.

Дайын асқа тік қасық, демекші Ләззат «күшік күйеу» атануға әзір тұрған талай жігітті көзі көрген. Айтуынша, бұл ер азаматқа жараспайтын қылық. Бір сөзбен айтсақ, намыссыздық. Еркектің басты қаруы – еңбекқорлығы.

Сондықтан болашақ жарым жұмыстан қорықпайтын, ісі мен сөзіне берік, жауапкершілігі мол адам болса, деп армандайды.