KAZAKBOL.COM
Қырғызстанда 21 шілдеде Орталық Азия мемлекеттері басшыларының кездесуі өтеді.
Қырғызстан президенті баспасөз қызметінің хабарлауынша, жүздесуге дайындық барысын 4 шілдеде қырғыз президенті Садыр Жапаров пен оның өзбекстандық әріптесі Шавкат Мирзияев телефонмен пысықтады. Мәліметке қарағанда, «Орталық Азия елдері басшыларының бәрі шақыртуды қабылдаған».
Көрші елдердің президенттері телефонмен әңгімелескен уақытта Садыр Жапаров «қырғыз жағы Өзбекстандағы жағдайға қатты алаңдағанын» айтты. Оның мәлімдеуінше, «батыл әрі дер кезінде қолға алынған жүйелі әрекеттің арқасында Қарақалпақстандағы жағдай реттеліп, оның ушығып кетуіне жол берілмеді».
Жапаров «Өзбекстандағы конституциялық реформалар тұрақтылықты қамтамасыз ету кепіліне айналып, елдің ұзақ уақытқа арналған стратегиясын жүзеге асыруға сеп болатынына» сенімді екенін айтты.
Похожие статьи
Дүйсенбі күні Шавкат Мирзияев Қазақстан президентімен де телефонмен сөйлесті. Ақорданың хабарлауынша, Қасым-Жомарт Тоқаев «өзбек басшылығының Қарақалпақстандағы тұрақтылықты қамтамасыз ету үшін дер кезінде шешім қабылдағанын» атап өтті.
Өзбекстан басшысы баспасөз қызметінің хабарлауынша, «Қазақстан президенті өзбек президентінің Қарақалпақстанда тұрақтылықты қамтамасыз етуді көздейтін шешімді әрекеттерін қолдаған».
4 шілдеде Өзбекстан билігі Қарақалпақстанда 18 адамның қаза болғанын мәлімдеді. Күш құрылымдарының наразылықты күшпен басуы кезінде 243 адам зардап шеккен. Ресми мәлімет бойынша, 516 адам ұсталған.
KAZAKBOL.COM
