Пентагон украин ғалымдарының зертханаларын қолдайды

Украинада биологиялық және химиялық қару бағдарламасы жоқ. АҚШ Қорғаныс министрлігі таратқан ақпаратта осылай делінген.

Құжатта Вашингтон денсаулық сақтау саласының 46 мекемесі мен зертханасын 20 жыл бойы қолдап келе жатқаны айтылған. Олардың бәрі денсаулық сақтау және ауыл шаруашылығы салаларындағы ауруларды анықтаумен айналысқан.

Пентагонның хабарлауынша, зертханалардағы жұмыстар Дүниежүзілік денсаулық сақтау ұйымы мен Дүниежүзілік жануарлар денсаулығын қорғау ұйымының қатысуымен жүргізілген. Украин ғалымдары халықаралық ережелерге сай жұмыс істеді, делінген мәліметте.

Бұның алдында Ресей Украина аумағында АҚШ Қорғаныс министрлігінің қолдауымен биологиялық қаруға қатысы бар зертханалар жұмыс істейді деп мәлімдеген. Вашингтон мен Киев мұны жоққа шығарып отыр. Құрама Штаттар Мәскеу жалған ақпаратты әдейі таратты деп есептейді.

БҰҰ Мәскеудің Украина биологиялық қару дайындады деген мәлімдемесін сынады. Кремльдің Киев биологиялық қару дайындайтынына қатысты қандай да бір мәліметі жоқ, дейді БҰҰ.

Источник