Петропавлда бесінші қабаттан секіріп кеткен 7 жасар бала аман қалды

Анасы 7 жасар баласын үйде жалғыз қалдырып, тығыз шаруаларымен сыртқа шығып кеткен. Жалғыздықтан іші пысқан ойын баласы есік жабық болған соң далаға терезеден шығуды жөн көріпті.

«Терезеден қарасам, достарым далада ойнап жүр екен. Менің де оларға қосылғым келді. Киініп, есікке беттесем, сырттан құлыптап кетіпті. Содан соң терезені ашып, далаға секірдім», – деп жауап беріпті жеткіншек дәрігердің неге мұндай қылыққа барғандығы туралы сұрағына.

Баланың құлағанын байқап қалған көршілер бірден жедел-жәрдем қызметін шақыртқан. Оның бесінші қабаттан секіріп, аман қалуына үйіліп қалған қардың пайдасы тиіпті.

«Бала ауруханаға келгенде не болғанын өзі айтып берді. Барлық сұрақтарға нақты жауап беріп жатты. Тек белінің ауыратынына шағымданды. Рентгенография, тиісті ультрадыбыстық және лабораториялық зерттеулер жасалды. Зерттеу бүйрегіне зақым келгенін және аздап миы шайқалған көрсетті. Ал, сүйектері сап-сау, еш жері сынбаған», – дейді облыстық балалар ауруханасының бас дәрігері Олег Завьялов.

Тиісті ем-шараларды алған ол ауруханадан шығарылып, әзірге үйде отыр. Келесі аптадан бастап мектепке барады. Тек дәрігерлер біраз уақыт дене шынықтыру сабағына қатыспауды өтінген.