Тоқтар Төлешов қызымен бірге. Фото: әлеуметтік желі
Дүйсенбі күні Астана қалалық қылмыстық істер жөніндегі мамандандырылған әскери соты атышулы шымкенттік бизнесмен, билікті күшпен басып алмақ болды деп, басқа да ауыр баптармен айыпталған Тоқтар Төлешов пен оның сыбайластарына қатысты үкімін шығарды.
«Сыра ханзадасы» 21 жылға бас бостандығынан айырылды. Жазасын қатаң режимдегі түзеу колониясында өтейді деп жазады Рейтинг газеті.
Тоқтар Төлешовтің заңсыз жолмен тапқан мүліктері, атап айтқанда, «Митцубиси», «Тойота», «Бентли», «Шевролет», «Тойота Ланд Крузер 200», BMW, «Мерседес» , «Порш Кайен», «Тойота Камри», «Vw Passat», «Тойота Прадо», «Инфинити», «Rolls-Royce», Лексус-250 автокөлітері мен 20 жылқысы, екі түйесі, жер телімдері тәркіленді.
Сондай-ақ зергерлік бұйымдар жасайтын 22 нысаны, Төлешовтің және оның отбасы мүшелері Оразгүл Жұмабаеваның, Надя Есенбаеваның, Сәуле Сауқанбаеваның, Дина Нұрәлиеваның банктік карточкаларындағы ақшасы, 183 дана зергерлік әшекей бұйымдары, айғақ ретінде алынған ер адамның сағаты, Досамбаевадан алынған 50 мың доллар, 18 мың доллар, 855 еуро, 1370 рубль 15 лир және 91 мың өзбек сомы мен 5 281 теңге де мемлекет меншігіне алынатын болды.
Төлешовтың иелегінде атақты «Шымкентсыра» зауыты ол ұсталған кезде-ақ кепілде тұрған банктің меншігіне өтіп кеткені белгілі. «Шымкентсыраның» ендігі қожайыны Ахметжан Есімовтың күйеу баласы Ғалымжан Есенов құрылтайшылық ететін АТФ банкі.
Яғни, бір кездері отбасылық той-думаннан қолдары босамайтын Төлешовтың әулеті ештеңесіз қалды деуге болады.