Талибан үкіметі Науаи, Бабыр, Беруни және Мәшраб кесенелерін жөндейді

Талибан үкіметі Өзбекстанмен бірге екі халыққа ортақ ұлы адамдар — Әлішер Науаи (Герат), Захириддин Бабыр (Кабул), Әбу Райхан Беруни (Газна) және Бабырахим Мәшраб (Тахор) кесенелерін көркейтеді.

Өзбекстан сыртқы істер министрлігінің хабарлауынша, Өзбекстан президентінің Ауғанстан жөніндегі арнайы өкілі Исматулла Иргашев бастаған делегациямен 30 қарашада Кабулда кездескен тәліптер осылай деп мәлімдеді.

Тәліптер ауған мектептері мен жоғары оқу орындарында өзбек тілін үйретуге ерекше мән беретінін айтты.

Кездесулерде Ауғанстандағы қазіргі жағдай, ауған халқына гуманитарлық және басқа көмек көрсету, энергетика және көлік салаларында ірі инфрақұрылым жобаларын жүзеге асыру мәселелері талқыланды.

Өзбекстанның көрші елге электр қуатын үздіксіз жеткізіп отыруы, өзбек-ауған шекарасының ашық болуы, Мазари-Шариф халықаралық әуежайын қалпына келтіруге көмектесуі, гуманитарлық көмек бергені сөз болды.

Талибан билігі «Сурхан-Пули-Хумри» электр желісін тарту, «Мазари-Шариф-Кабул-Пешавар» темір жол құрылысы жобасын қолға алуға дайын екенін мәлімдеді.

Источник