KAZAKBOL.COM
Ташкент әскери прокуратурасы биыл қаңтарда әскери бөлімдердің бірінде қайтыс болған сарбаз Миржалол Имамов өлімін суицид деп таныды.
Тергеу қылмыс құрамы болмағандықтан сарбаз өліміне қатысты қылмыстық іс қозғаудан бас тартты, деп хабарлады Өзбекстан бас прокуратурасының баспасөз қызметі.
Тергеу мәліметінше, 11 қаңтарда Имамов сағат 10:00 шамасында әскери бөлімдегі демалыс бөлмесіне кіріп, қару-жарақ сөресінен кезекші сержанттың әскер автоматын алған. Содан кейін сарбаз өз-өзін атып өлтірген.
Похожие статьи
Ташкент әскери прокуратурасы сарбаз өлімі тіркелген әскери бөлімде қару-жарақты пайдалану тәртібі әлсіз екенін анықтаған. Соған байланысты әскери бөлім басшылығына сөгіс жарияланған.
Ташкент облысы Зәңгіата ауданындағы әскери бөлімде сарбаз өлгені туралы мәлімет 17 қаңтарда тарады. Ресми мәліметте 20 жастағы сарбаз өз-өзін абайсыз атып өлтірген деп жазылған.
Алайда Имамовтың туыстары суицид нұсқасына сенбей отыр. Олар марқұмның денесінде көгерген іздер мен ісіктер қалғанын, екі тісі сынғанын көрген. Бұған қоса, марқұмның анасы осы оқиғадан соң сарбаздың екі әріптесі ұсталғанын айтқан. Осы мәліметтерге сүйенген марқұмның туыстары Имамовты әскери бөлімде өлгенше ұрған деген болжам жасаған.
KAZAKBOL.COM
