Біз Орталық Азия туралы айтқанда ең алдымен көз алдымызға Қазақстан келеді.

Алыс әрі экзотикалық Ямайка Қазақстанмен ынтымақтастыққа мүдделі. Бұл туралы Біріккен ұлттар ұйымының штаб-пәтеріндегі мәжілістен соң Кариб бассейніндегі аралдағы мемлекеттің тұрақты өкілі Кортни Раттрэй айтты, деп хабарлайды 24.kz арнасы.

«Қазақстан мен Ямайка ынтымақтастығының келешегі мол. Әлемдік аренада Қазақстанның өзіндік орны бар, әсіресе соңғы жылдары жақсы көрініп жүр. Сіздердің елдеріңізге барлығы көңіл бөледі. Біз Орталық Азия туралы айтқанда ең алдымен көз алдымызға Қазақстан келеді. Сіздердің тараптарыңыздан көптеген жақсы ұсыныстар жасалады. Халықаралық қауымдастық оны өте жоғары бағалайды. Қазір біз ұзақмерзімді және тұрақты даму туралы талқылап жатырмыз. Мұхит пен теңіз мәселесі БҰҰ-ның 2030 жылға дейінгі жоспарына енгізілген. Ашаршылықпен күрес, инфрақұрылымды дамыту, су мәселесінің шешімі бұлардың барлығы маңызды. Табысқа жету үшін үкіметтің, халықаралық құрылымдардың, жекеменшік сектор мен үкіметтік емес ұйымдардың атсалысуы керек», дейді Ямайканың БҰҰ жанындағы тұрақты өкілі Кортни Раттрэй.

Фото: 24.kz