«Қырғызфармация» мемлекеттік кәсіпорынын құруға $5,7 млн бөлінеді

Қырғызстан үкіметі денсаулық сақтау министрлігі жанынан «Қырғызфармация» мемлекеттік кәсіпорынын құру туралы қаулы қабылдады. Бұл туралы үкімет сайтында хабарланды.

Ресми мәліметке қарағанда, «Қырғызфармация» медициналық мекемелерді арзан дәрі-дәрмекпен қамтамасыз ету мақсатында құрылады. Жаңадан құрылатын мемлекеттік кәсіпорын дәрі-дәрмекпен қамтамасыз ету ісін жаңа әдіспен жүргізе бастайтыны айтылды.

Үкімет мәліметінше, мемлекеттік мүлікті басқару қоры кәсіпорынды ғимаратпен қамтамасыз етеді. Бұған қоса, қаржы министрлігі 500 млн сомды ($5,7 млн) бюджет несиесі ретінде аударады. 2023 жылы «Қырғызфармация» қызметкерлері еңбекақысын қоры 30 млн сом ($340 мың) болады.

Денсаулық сақтау министрлігінің мәліметінше, Қырғызстанда дәрі-дәрмек жеткізумен айналысатын 200-ге жуық фирма, 3200-ден аса дәріхана бар. Олардың дені Бішкек қаласында орналасқан.

Источник