Өзбекстанда оқушының туыстары жүкті әйелді сабаған

Өзбекстанның Қашқадария облысында құқық қорғау органдары Касбий ауданында мұғалімнің сабалғанын тексеріп жатыр.

Ақпаратқа қарағанда, Чулкувар ауылындағы мектепте ағылшын тілінен сабақ беретін Лобар Эргашеваны оқушыларының бірінің туыстары 26 сәуірде сабап кеткен.

– Сол күні 2 сынып оқушыларына сабағым болды. Сабақ басталғанда артқы партада отырған балалар шулап, бұзықтық жасай бастады. Мен оларға ескерту жасадым. Олар мені тыңдамады. Сабағымды әрең аяқтадым. Одан кейін 1 сыныпқа сабақ өткізе бастадым. осы кезде мен ескерту жасаған баланың анасы сыныпқа кіріп келді. Ол менің әріптесім, бірге жұмыс істейміз. Менің жүкті екеніме қарамай, 1 сынып оқушыларының көзінше маған қол көтерді, — деді Лобар Эргашева.

Бойында жеті айлық баласы бар Лобар Эргашеваның жағдайын дәрігерлер бірқалыпты деп бағалады.

– Қолы көгерген. Баланың және өзінің өміріне қауіп жоқ, – деді Қашқадария облысындағы медициналық орталықтағы дәрігерлердің бірі.

Мектеп директоры Олимжон Нуриллаев бұл оқиға бойынша тексеру жүріп жатқанын хабарлады.

– Мұғалімнің оқушының бетінен екі рет шапалақтап ұрғаны белгілі болды. Жанжал сондықтан шыққан, – деді Нуриллаев.

Сәуір айының ортасында Қашқадария облысының Чиракчин ауданында тағы бір ағылшын тілі мұғалімі оқушысына «екі» деген баға қойғаны үшін сабалған.

Источник