Құқық қорғаушылар Бішкекте митинг өткізуге салынған тыйымға арызданды

«Кылым шамы» адам құқықтарын қорғау ұйымының жетекшісі Гүлшайыр Әбдірасулова 1-май аудандық сотының астанадағы осы ауданда митинг өткізуге салынған тыйым мерзімін ұзарту жөніндегі шешіміне шағымданды.

Бұл туралы Әбдірасулова Азаттықтың Қырғыз қызметіне хабарлады.

Құқық қорғаушы сот шешіміне арызын Бішкек әкімшілік сотына өткізген. «Кылым шамы» жетекшісінің пікірінше, соттар биліктің шешімдерін бұлжытпай заңдастыратын «нотариусқа» айналып кетті.

1 желтоқсанда Бішкектің 1-май аудандық соты астананың осы ауданында митингілер өткізуге салынған тыйым мерзімін созуды заңды деп таныды. Сот шешімімен «Ала-Тоо» алаңында, Еркіндік бульварында, Жогорку Кеңеш ғимараты маңында, президент әкімшілігі, Жоғарғы сот, Ресейдің Қырғызстандағы елшілігі, ҰҚМК ғимараты алдында митинг өткізуге болмайды. Дегенмен мемлекеттік және жергілікті билік «Ала-Тоо» алаңында түрлі шаралар ұйымдастыра алады. Қала тұрғындары наразылық акцияларын Горький атындағы бақта ғана өткізеді.

Источник