KAZAKBOL.COM
18 наурызда журналистердің сұрақтарына жауап берген ақпарат және қоғамдық даму министрі Асқар Омаров елде журналистер қудаланбайтынын және оларға «шетел агенті» деген «ресми статус» берілмейтінін жеткізді. Бұл жөнінде жергілікті ақпарат агенттіктері жазды.
«Бізде журналистер мен БАҚ қудалауға ұшырамайды деп ойлаймын» деді шеттен қаржыландырылатын ақпарат құралдары туралы сұрақтарға жауап берген министр.
Көрші Ресейдегідей жекелеген ақпарат құралдары «шетел агенті» ретінде танылмай ма деген сұраққа министр «біздің жолымыз бөлек» деді.
«Біздің жолымыз – ақпарат құралдарын тиімді дамыту, бәсекеге қабілетті ету және оларға оқырман сұранысын арттыру» деді ол.
Омаров сонымен бірге отандық БАҚ контентіне қарай отырып, елде «баспасөз еркіндігі бар» деп тұжырым жасауға болатынын айтты.
Похожие статьи
Осы апта ортасында халыққа жолдауында президент Қасым-Жомарт Тоқаев «мемлекет, қоғам мүддесі мен медиа саласындағы даму тенденцияларды ескере отырып» БАҚ туралы заңды қайта қарау қажеттігін айтқан. Оның айтуынша, БАҚ өте өзекті мәселелерді қозғауы тиіс, бірақ «саяси кландардың жасырын күресіне қатысып, жасырын қаламақы немесе тапсырыс үшін» емес, мәселеге «өте үлкен азаматтық жауапкершілікпен» қарауы тиіс. Бірақ ол кімдерді меңзегенін айтпады. Кейбір сарапшылар Тоқаев мәлімдемесінен кейін мемлекет медиа кеңістігіне бақылауды күшейтеді деп болжаған.
Премьер-министр Әлихан Смайылов жұма күні ақпарат министрлігіне БАҚ туралы заңнамаға енетін өзгерістерді журналистер және сарапшылармен талқылауды тапсырған.
Тәуелсіз баспасөз қорғау ұйымдарының айтуынша, Қазақстанда журналистер жиі қысымға ұшырап, кәсіби қызметін атқару кезінде кедергіге тап болады. Қаңтар оқиғасы кезінде елде бірқатар жаңалықтар сайты ашылмай қалды. Журналистер кәсіби қызметін атқару кезінде ұсталып, кейбірінің үстінен іс қозғалып, тергелді.
“Шекарасыз тілшілер» ұйымының Дүниежүзілік сөз бостандығы рейтингінде Қазақстан 180 елдің арасында 155-орында тұр және «сөз бостандығы ахуалы қиын» елдер қатарында.
KAZAKBOL.COM