Алматыдағы атыс кезінде Бауыржан Байбек қайда болды?

Бүгін Астанадағы үкімет отырысынан кейін ішкі істер министрі Қалмұхамбет Қасымов арнайы баспасөз мәслихатын өткізіп, журналистердің сұрақтарына жауап берді.

Сол сауалдардың ішінде «Алматыдағы атыс кезінде қала әкімі Бауыржан Байбек неге үндемей қалды? Ол өзі қалада болды ма?» деген сұрақ та болды, деп хабарлайды Baq.kz.

«Барлығында өзінің жұмыс жасау алгоритмі бар. Ал арнайы қызметтер мен полиция жұмыс істеп жатқан жерде азаматтық басшыларға (әкім – авт.) қандай да бір шараларды қолданудың қажеті жоқ. Біз кеше әкіммен байланыста болдық. Бәрін талқылап алған соң, ол жарақат алған және қаза болғандарға көмек беру мәселелері бойынша тиісті шараларды қолға алды», — деп жауап берді Қасымов журналистердің қойған сұрағына. Министрдің айтуынша, кеше Алматының әкімі қалада болады.

Айта кетейік, үкіметтің бүгінгі отырысында министр Қалмұханбет Қасымов кешегі атысқа қатысты тағы бір жәйтті ашып берді. Қылмыскер Руслан Күлікбаев  атысты Алмалы аудандық ішкі істер департаментінен емес, аудандық сот ғимаратынан бастауды жоспарлаған.

Бүгін Алматы ауруханасында ауыр жағдайда жатқан тағы бір полицей көз жұмды. Министрдің сөзіне қарағанда, Алмалы аудандық ішкі істер департаментіне шабуыл жасалғанда қылмыскердің жанында сыбайласы болған жоқ.