Бұл туралы видео YouTube желісінде пайда болған.

Видеодан жасөспірімдер арасындағы әлем чемпионы Рахат Маржықпаев қарсыласынан жеңілген соң, оның бапкері жекпе-жек төрешісініе қол жұмсағанын көруге болады. Төреші де өзіне жазықсыз қол көтерген бапкерге жауап қайтарып үлгерді.

Кейін бапкерін жақтаған боксшы Рахат Маржықпаев та төрешіге аямай соққы жұмсайды. Осы кезде залдағы көрермендер мен өзге де бапкерлер төбелес шығарғандарға араша түсті.

Осы туралы белгілі журналист Көсемәлі Сәттібайұлы Facebook парақшасында жазып, төрешіні ұрған бапкер боксшының әкесі әрі Астана қалалық дене шынықтыру және спорт басқармасының басшысы Берік Маржықпаев екенін айтты.

— Жанкүйерлерден смс хат кеп жатыр. Олар төрешіні ұрған бапкер емес, Астана қалалық спорт және денешынықтыру басқармасының басшысы Берік Маржықпаев дейді. Сонда жеңіліп қалғандарына қарамастан, баласы екеуі судьяны жабылып ұрған болып тұр ғой.

Астана қаласының әкімі Әсет Исекешовтің назарына:

Астана қалалық спорт және денешынықтыру басқармасының басшысы Берік Маржықпаев пен оның баласы Рахат Маржықпаев екеуінің бұл ұрдажық мінезі, жеңістің бәрі біздікі дегендей астамшылығы, өзінен басқаны адам құрлы көрмейтін озбырлығы мемлекеттік қызметкердің әдебі мен әдетіне, спортшының этикасы мен эстетикасына сай келе ме?

Меніңше, мәселені көп созбай әкесін — қызметтен, ұлын — спорттан шеттету керек.

Спорт — достық пен татулықтың, бірлік пен бейбітшіліктің символы. Онда дөрекі, ұрдажық, озбыр басшылар мен боксшыларға орын жоқ, — деп жазған журналист.

Еске сала кетейік, Рахат Маржықпаев 2013 жылы Украинада жасөспірімдер арасындағы әлем чемпионы атанған болатын.

Nur.kz