KAZAKBOL.COM
Астананың N2 Байқоңыр аудандық соты «терроризмді насихаттады» деп айыпталған суретші Дәурен Макинді жеті жылға бас бостандығынан айырды.
Бұған дейін прокурор оны сегіз жылға соттауды сұраған. Ақпаратқа қарағанда, сот ол бұрын сотталмағанын, кәмелетке толмаған балаларын барын ескерген.
Суретші өзіне тағылған айыпты мойындамайды. Былтыр Қаңтар оқиғасынан кейін сурет, эскиздер жариялағанын айтқан суретші бар айып «сурет салуды үйренеміз» деп келген арнайы қызметтің адамдарымен болған «әңгімеге» негізделгенін айтады.
– Олар маған жала жауып отыр. Кінәсіз екенімді дәлелдеуге қанша тырысқаныммен, ескерген жоқ. Facebook-те елдегі саяси оқиғаларға қатысты пікір жарияладым. Соған байланысты соттап отыр. Үкімге келіспеймін, апелляцияға беремін, – деді Дәурен Макин соттан кейін Азаттыққа.
Былтыр суретшінің адвокаты мен жақындары Макинге сурет салуды үйренеміз деген сылтаумен екі адам келіп, ортадағы әңгімені диктофонға жазып алғанын айтқан еді. Келгендер арнайы қызмет адамдары екені кейін анықталған. «Бар айып сол әңгімеге негізделген» дейді қорғау тарабы.
– Басқа ешқандай дәлел жоқ. Барлық айыптау әлдебір диктофондағы жазбаға құрылған. Оны да қолымызға берген жоқ. Бірақ сол жазбаға сараптама жасап, Макиннің сөзінде террористік сарын бар екені, әлгі екі адаммен әңгімеде билікті ауыстырып, оны шариғат жүйесіне негіздеп қайта құру керек деген ой айтылған деп қорытынды жасаған, – деген еді бұған дейін адвокат Жасұлан Көмеков.
Байқоңыр аудандық сотының судьясы 27 сәуірде Азаттық тілшілеріне сот залынан видео түсіруге рұқсат берген жоқ. Қарауылды есептемегенде сотта судьядан басқа ешкім болған жоқ.
Похожие статьи
Кей дереккөздер Макин мессенджерде «әлдебір хабарламаны жібергені үшін» істі болды деген болжам айтты.
Ұлттық қауіпсіздік комитеті суретші Макиннің тұтқындалуына қатысты жауап беруден бас тартқан.
Суретші Дәурен Макиннің «Наурыз», «Мастер» картиналары Астанадағы тарихи музейге қойылған. Оны әріптестері ұлттық, тарихи тақырыптарға көп картина салған суретші ретінде сипаттайды.
Қазақстанда кейінгі жылдары «терроризм» айыбы бойынша ондаған адам сотқа тартылған. Орталық Азиядағы постсоветтік елдің билігі әдетте мемлекет қолдау танытатын «дәстүрлі діндерден» өзгеше кей діни топтарды «деструктив ағымдар» деп сипаттайды.
2018 жылы Щучинск тұрғындары жеке кәсіпкерлер Дадаш Мәженов пен Ғалымжан Әбілқайыровты әлеуметтік желідегі аккаунттарында діни мазмұндағы аудио жариялағаны үшін «терроризмді насихаттады» деп айыптап, жеті жылдан астам уақытқа түрме жазасын кескен.
Олар айыбын мойындамай, қарсы арыз түсіргенімен, ешқайсысы қанағаттандырылмады.
KAZAKBOL.COM