Бірінші орта салмақта бақ сынайтын қазақ кәсіпқой боксшысы Мадияр Әшкеев АҚШ-тың Коннектикут штатына қарасты Анкасвилл қаласында өткен бокс кешінде америкалық Шон Кэмеронды жетінші раундта техникалық нокаутпен ұтты, — деп хабарлайды Vesti.kz.

Қос боксшы арасындағы жекпе-жек жетінші раундтың екінші минутында тоқтатылды. Төрешілер Шон Кэмеронның кездесуді жалғастыруға қауқары жетпейтінін байқап, Мадиярды уақытынан бұрын жеңімпаз ретінде таныды.

Мадияр Әшкеев кәсіпқой бокстағы сегізінші жеңісіне қол жеткізді. Отандасымыз осыған дейінгі барлық жекпе-жектерінде жеңіске жеткен.

Мейірім Нұрсұлтанов кәсіпқой бокстағы екінші жекпе-жегін өткізді. АҚШ-тың Коннектикут штатына қарасты Анкасвилл қаласында өткен бокс кешінде отандасымыз мексикалық боксшы Хавьер Ольвераны екінші раундта техникалық нокаутпен жеңді.

Қос боксшы арасындағы жекпе-жек 6 раундқа жоспарланған болатын. Екінші раундтың 1:15 минутынан кейін төрешілер жекпе-жекті тоқтатты. Мейірім айқын жеңіске жетіп, кездесуді уақытынан бұрын аяқтады.