ОҚО-да аруаққа табынып, төбеден домалаған сектанттар жұртты шошытты (видео)

— Жуырда Оңтүстік Қазақстан облысы, Отырар ауданындағы әйгілі Отырартөбеде келеңсіз оқиғаның куәсі болдық. Бір топ сектант (іс-әрекеттеріне қарап, осылай демеске лаж жоқ) қасиетті орында ойларына келгенді істеп жүр. Анығында, еркек демей, қатын демей, бірінен соң бірі төбеден домалап түсіп жатыр. Ешқайсысы жөндерін айтқысы келмейді. Отырарлық ағайындардың өзі бұрын-соңды мұндайды көрмеген. Әдетте ақылға сыймайтын осындай әрекетпен көлденең пайда тапқысы келетін алаяқтар немесе дәстүрлі дінімізге жат сектанттар айналысуы мүмкін. Мына оқиғаның кейіпкерлерін қайсы топқа жатқызсаңыз да, еркіңіз, — деген автор секнаттардардың видеосын жариялаған.

Әйгілі Отырар қаласының орны – бүгінде ашық аспан астындағы мұражай. Мұнда 30 мыңға жуық экспонат бар. Отырартөбеге әлемнің әр жерінен мыңдаған турист үздіксіз ағылып жатады.

Ғалымдардың жазуынша, әлемдегі ең ірі кітапханалардың бірі осы Отырар қаласында болған.

— Туристерді қызықтыратын да осы – көне қаланың озық мәдениеті. Ал енді шетелдіктер қасиетті орында әлгіндей оқиғаны көрсе, Қазақстан туралы не ойлайды? «Мәдени құндылықтарының қадірін білмейтін жабайы ел екен» деп кетпей ме, келген-кеткен қонақ, — деп жазады автор.

Осы орайда, автор Дін істері және азаматтық қоғам министрлігінен және Қазақстан мұсылмандары діни басқармасынан осы оқиғаға байланысты ресми жауап күтеді.