Ресей 11 шілдеден бастап «Солтүстік ағын»арқылы газ беруді тоқтатты

Ресей 11 шілдеден бастап Германияға «Солтүстік ағын» газ құбыры арқылы табиғи газ беруді тоқтатты.

Газ айдау тоқтайтынын газ құбырының операторы — Nord Stream AG компаниясы алдын ала ескерткен. Компания жоспарлы тексеру жұмыстары 21 шілдеге дейін созылады деп отыр. Германия мен Еуроодақтың басқа да елдері газ сол күйі берілмей қала ма деп қауіптенеді. Өйткені мұның соңы Еуропада энергетика дағдарысын тудыруы мүмкін.

Газ құбыры жылда бірнеше күнге тексеру жұмыстары үшін тоқтатылады. Алайда биыл «Солтүстік ағын» арқылы газ жіберу биыл екі есе азайған.

«Газпром» газ беруді қысқартуға Канадада жөндеуде жатқан Siemens газ турбиналарын Ресейге қайтармай қоюымен байланыстырды. Дегенмен Берлин Ресей шешімінің саяси астары бар деп есептейді. «Ресей энергияны қару ретінде пайдаланып отыр», — деп мәлімдеді 6 шілдеде ГФР канцлері Олаф Шольц.

Германия Канадамен келіссөздер жүргізіп, Оттавадан турбиналарды қайтаруын сұраған. Канада үкіметі оларды Германияға қайтаруға уәде берген. Турбиналар сол ел арқылы Ресейге жетуі мүмкін. Мәскеу әзірге бұл мәселеге қатысты мәлімдеме таратпады.

Ресей газын жеткізу толық тоқтайтын болса, онда Германия мен Еуроодақтың бірқатар елінде жанармай дефицитке айналып, үкіметтер газ беруді шектеуге көшеді. Германия қазірдің өзінде энергияны үнемдеуді көздейтін төтенше жүйеге көшті. Мұндай жүйе Еуроодақтың басқа да елдеріне тарауы мүмкін.

Источник