Тәжікстан таяу үш жылда Азия даму банкінен 462 млн доллар алады

Азия даму банкі таяу үш жылда Тәжікстанға энергетика, көлік, білім, денсаулық сақтау, азық-түлік қауіпсіздігі және мемлекеттік басқару салаларын дамыту үшін 462 млн доллар бөледі.

Бұл жөнінде Тәжікстанның қаржы министрлігі мекеме басшысы Файзиддин Каххорзода мен Азия даму банкінің Тәжікстандағы өкілі Шэнни Кэмпбеллмен 2022-2024 жылдарға арналған бизнес-жоспарды талқылау кезінде мәлім болғанын хабарлады.

Сонымен бірге өткен аптада Азия-Тынық мұхит қорының вакциналарға қол жетімділік жобасына сәйкес Азия даму банкі Тәжікстанға 25 млн доллар көлемінде грант берілетіні хабарланған. Бұл жобаны жүзеге асыру биыл басталған, 2023 жылға дейін созылады.

Бұл жоба аясында COVID-19 вирусына қарсы 3,4 миллион дана вакцина сатып алынбақ. Тәжікстан билігі жасы 18-ден асқан тұрғындардың 62 пайызына коронавирусқа қарсы вакцина салуды қарастырып жатыр.

Тәжікстан Үндістанда шығарылған еуропалық AstraZeneca вакцинасының 192 мың данасын алған. Бірер күн бұрын Қытайда шығарылған CoronaVaс вакцинасының 300 мың данасы жеткізілді.

Азия даму банкі Тәжікстанға қаржылай көмек беріп келе жатқан ірі донорлардың бірі. Аталған қаржы институты бірнеше жылдан бері Тәжікстанның жол және энергетика салаларын дамыту үшін грант бөліп келеді. 1998 жылдан бері 2,2 млрд доллар бөлген. Оның 1,6 млрд доллары грант ретінде берілген.

Источник