KAZAKBOL.COM
Тәжікстан мәдениет министрі Душанбеде «Мәңгүрт. Реквием» қойылымын көрсетуге не себепті тыйым салғанын түсіндірді. Шыңғыс Айтматов романының желісімен дайындальған спектакльді танымал тәжік режиссері Барзу Әбдураззақов ұсынған.
Министр Зульфия Давлатзода режиссер «шығармадан тым ауытқып, оның мазмұнын бұзып жіберген» деді, бірақ нақты мысал келтірмеді. Танымал тәжік режиссері Барзу Әбдураззақов ресми хат алғанын, бірақ министрлік ұстанымымен келіспейтінін айтты.
Шыңғыс Айтматовтың «Ғасырдан да ұзақ түн» романының желісімен қойылған «Мәңгүрт. Реквием» спектаклінің тұсаукесері 20 мамырда «Падида» театрының сахнасында өтуі тиіс болған. Алайда 19 мамырда билік оған тыйым салып, қойылымды әуелі шығармашылық кеңес мақұлдауы тиіс екенін айтқан.
Тәжікстан мәдениет министрінің мәлімдеуінше, шығармашылық кеңес биыл маусымда қойылымды қарап, оны мақұлдамаған.
Похожие статьи
«Режиссер шығарма авторы Шыңғыс Айтматов жазғандарынан бас тартып, оған өзінің сөздерін қосқан, сөйтіп мазмұнын бұрмалаған. Мұндай түрдегі және мазмұндағы спектакль елдің қазіргі ішкі және сыртқы саясатына сай келмейді, сонымен бірге өскелең ұрпақты дұрыс тәрбиелеу мақсатына да қайшы, яғни оны шығармашылық кеңес мақұлдамады», — деп түсіндірді Зульфия Давлатзода.
Барзу Әбдураззақов 12 шілдеде Озоди радиосына берген сұхбатында Шыңғыс Айтматов шығармасының мазмұнын өзгертпегенін, бірақ ондағы орта мен кейіпкерлерді қазіргі тәжік қоғамына сай бейімдегенін айтқан.
«Біз шығарманы Тәжікстандағы жағдайға сай бейімдеп, тәжік әйелі мен оның ұлы — мәңгүрттің трагедиясы туралы сюжет дайындадық. Біз саясатқа тиіспедік. Біз тәжіктің ұлт ретінде қалыптасу тақырыбын қозғадық. Мәңгүрттені — халқымыздың ең маңызды мәселелерінің бірі деп түсінемін. Ал енді қойылым елдің ішкі және сыртқы саясатына сай емес дегені, орыстар ренжіп қала ма деген қауіптен шыққан секілді», — дейді режиссер.
«Мәңгүрт. Реквием» — режиссер Барзу Әбдураззақовтың Тәжікстанда біраз жылға созылған үзілістен кейінгі алғашқы қойылымы. Ондағы кейіпкерлерді жас әртістер сомдауы керек болған, олардың арасында жақында ұсталған блогер Далери Имомали де бар.
KAZAKBOL.COM