Тәжікстанда Таулы Бадахшанның биресми лидерінің тағы бір ұлы ұзақ мерзімге сотталды

Тәжікстанда Таулы Бадахшанның биресми лидері және бұрынғы командирі Толиб Аембековтің екінші ұлы, 25 жастағы Хасанали Абдурахмонов 12 жылға бас бостандығынан айырылды. Бұл жөнінде Озоди радиосы дереккөзіне сілтеме жасап хабарлады.

Ақпаратқа қарағанда, Абдурахмоновқа жаппай тәртіпсіздікке қатысы бар, заңсыз қару-жарақ сатты, ұйымдасқан қылмыстық топтың мүшесі болды деген айыптар тағылған. Ол сот отырысы кезінде өзіне тағылған айыптардың бірін де мойындамаған.

Хасанали Абдурахмонов пен оның ағасы Гуломали Аембеков 23 шілдеде ұсталған. Осының алдында Гуломали Аембеков, Хайримамад Дустмамадов және Аслан Гулобов генерал Абдулло Назаровтың өліміне кінәлі деп танылып, өмір бойы түрме жазасына кесілген.

Толиб Аембековтің өзі 11 шілдеде ұсталған. Билік таратқан мәліметте, ол адам өлтіру, заңсыз есірткі және қару-жарақ сату, жаппай тәртіпсіздік ұйымдастыру бойынша айыпталып жатқаны айтылады.

Источник