KAZAKBOL.COM
Украинада Қазақстанның кемінде 89 азаматы және 30-дан астам жүк көлігі қалды. 3 наурызда Қазақстан сыртқы істер министрлігі осылай деп хабарлады.
«Қазіргі уақытта Катовице қаласында Қазақстанның 68 азаматы елге баратын ұшақты күтіп отыр. Бұған дейін шекарадан өткен бірқатар азаматтар ЕО аумағында қалуға шешім қабылдаған. Сонымен қатар, азаматтарымызды украин-поляк шекарасына жеткізу үшін Киевтен 57 адамға және Львовтан 41 адамға сапар ұйымдастырылды» деп жазылған Қазақстан СІМ хабарламасында.
Ведомство мәліметінше, эвакуация басталғалы бері 431 Қазақстан азаматына басқа елге кетуіне жәрдем берілген: Польшаға – 404 адам, Молдоваға – 21 адам, Венгрияға – 5 адам, Словакияға 1 адам кеткен.
Air Astana әуе компаниясының эвакуациялық екі рейсімен Катовице қаласынан 299 адам Қазақстанға жеткізілген. Қазір үшінші эвакуациялық ұшақ жіберу мәселесі қарастырылып жатыр.
Похожие статьи
Қазақстан СІМ мәліметінше, Украинада ұрыс қимылдары басталғалы бері ол жақта 55 автокөлік мінген 47 жүргізуші қалған. Жүргізушілердің сегізі – шетелдіктер, қалғаны Қазақстан азаматы. 55 автокөліктің 13-і қазақстандық дипломаттардың көмегімен Ресей шекарасынан өткен, сегізі – Молдова, үшеуі Польшаға өткен.
СІМ қазақстандық тасымалдаушылардың 31 көлігі Украина аумағында қалғанын айтады.
«Азаматтардың және жүк тасымалдаушылардың орналасқан жеріне байланысты Қазақстанның Ресей, Беларусь, Польша, Словакия, Венгрия, Румыния және Молдовадағы өкілдіктері олармен тұрақты байланыста және сол елдердің билігімен эвакуациялау мәселесі қарастырылып жатыр, сондай-ақ неғұрлым қауіпсіз эвакуациялық жолдар ұсынылуда» деп жазылған хатта.
Осыған дейін Украинада қалып қалған ондаған жүк тасымалдаушысы Қазақстан үкіметінен көмек сұраған. Қазақстанның түрлі аймағынан келген жүк көліктері Киев пен маңындағы елді мекендерде тұрып қалған. 26 ақпанда «Атамекен» кәсіпкерлер ұлттық палатасы кемінде 50 жүргізушінің хабарласып, қайда екендіктерін хабарлағанын жеткізді. «Жүргізушілер көлікті тастап, елден кете алмайды» деді палатадағылар.
KAZAKBOL.COM