KAZAKBOL.COM
Жоғарғы соттың кассациялық алқасы Sotreport.kz сайтының тілшісі Татьяна Ковалеваны мақаласын жоюға міндеттеген Әскери сот шығарған жеке қаулының күшін жойды. 18 наурызда «Әділ сөз» баспасөз қорғау ұйымы осылай деп мәлімдеді.
«Өте сирек жағдай: Әскери сот журналиске жеке қаулы шығарды. Ал Sotreport.kz тілшісі Татьяна Ковалева шағымданған Жоғарғы соттың кассациялық алқасы қаулының күшін жойды. Бұл да өте сирек кездеседі» деп жазды «Әділ сөз» жетекшісі Тамара Калеева Facebook парақшасында.
Калееваның айтуынша, бұрын прокуратура журналистің өтінішін орындаудан бас тартқан. Ал ақпарат және қоғамдық даму министрлігі «заңбұзушылықты жойып», мақаланы өшіруді талап еткен.
Похожие статьи
«Қазақстандық сот тілшілері лигасының» өкілі Татьяна Ковалева 2018 жылы Ұлттық гвардияда мемлекеттік тапсырысты орындау кезінде ақшаны жымқыру ісі бойынша болған сот отырыстарынан ақпарат таратқан. Айтуынша, осы соттан он шақты материал жариялаған. Сот алқасы осы материалдардың нақты екеуіне шүйліккен. Екеуі де Ұлттық қауіпсіздік комитеті жайлы болған.
Былтыр қазанда сот алқасы аталған материалдардағы жайттар шындыққа сәйкес келмейді деп тұжырымдап, оны жоюды талап еткен. Ал Ковалева жарияланған материалды талапкер тарап ІІМ берген ақпаратына сүйеніп жазғанын айтқан. Журналистің айтуынша, сот шешімінде нақты қандай «заңбұзушылықтар» болғаны да айтылмаған. Журналистер мен құқық қорғаушылар сол кезде жеке сот қаулысының жойылуына күш салатынын мәлімдеген.
Мәжіліске «Нұр Отаннан» (қазір «Аманат» деп аталады) сайланған депутат Нұрлыбек Ожаев қазан айында ақпарат құралдарына сот өндірісінде жатқан істер туралы ақпаратты жариялауға тыйым салуды ұсынған. Баспасөз қорғау ұйымдары сол кезде «әлдекімдерге соттың ашықтығы ұнамайды, сот залдарынан репортаждың көп болғанын қаламайды» деп мәлімдеген. Кейін аталған түзету қабылданбай, кері қайтты.
KAZAKBOL.COM