Қазақстанның батысында орманды және жазық алқап өртеніп жатыр, өрт 21 гектарды шарпыған

16 тамызда Батыс Қазақстан облысының Бәйтерек ауданының екі ауылының ортасында құрғақ шөп өртеніп, жақын маңдағы орманды шарпыған. Кейін өрт Орал өзенінің арғы бетіне өткен.

Қазір өрт аумағы 21 гектарға жеткен.

Құрғақ шөп өртенген Бәйтерек ауданының Трекино және Володарка ауылдары Орал қаласынан 15 шақырым жерде орналасқан.

Құтқарушылар өрт аумағында ойнап жүрген тоғыз баланы және бір ересек адамды құтқарып қалған. Оқиға орнына тағы 31 құтқарушы жіберілген.

Әзірге өрттің себебі күннің ыстығынан деген болжам айтылып жатыр.

«Жаз өте ыстық болып жатыр, оның үстіне ыстық жел жалынды бірден таратып әкетеді. Орманшылар қазір аз. Олар құрғақ шөпті тазалап үлгермейді. Тағы бір фактор — Орал өзені тартылып жатыр. Талдар қурап жатыр,- дейді «Жасыл майдан» қозғалысының өкілі Злата Удовиченко.

Источник