Атырауда адам өлтірген сәті камераға түскен күдіктілердің бірі бостандықта жүр

Қанды оқиға 6 ақпан күні таң алдында болған. Бұл жәйт жақын маңдағы ғимараттардың біріне орнатылған бейнебақылау камерасына түсіп қалыпты. Онда 23 жастағы Қожақанат Нұржановты екі адамның ұрып-соғып, пышақтап жатқаны анық көрініп тұр. Бірақ марқұмның туыстары полицейлердің осы таспаны көре тұра, күдіктілердің бірін бостандыққа жіберіп, тек «бұзақылық» бабымен іс қозғағанына наразы.

«Аса қатыгездікпен өкпесін, бауырын, талағын қатты жарақаттап алған. Полиция қызметкерлері келіп, жауап алып, арыз алып ештеңе істеген жоқ. Шағым  алмай, оларды бостандыққа жіберіп отыр. Бұзақылық деп», — дейді марқұмның әпкесі Әсел Сәрсенбаева.

Қожақанат Нұржанов бірнеше жерден сұғылған пышақ жарақатынан аурухананың жансақтау бөлімінде қайтыс болды. Ал оны соққыға жыққан екеу – 22 жастағы Жаңаөзен қаласының тұрғындары. Қазір бұлардың бірі – уақытша тергеу абақтысында отырса, екіншісі кепілақымен босатылған. Ал бұған көңілі толмаған жәбірленуші тарап қылмыстық істің де «адам өлтіру» бабы бойынша қозғалуын талап етіп отыр.

Күдіктілердің бірі кепілмен босатылғанын тәртіп сақшылары да растады. Бірақ, қайтадан қамауға алынып, «денсаулыққа ауыр зақым келтіру» бабы бойынша қозғалған іс те тергеу барысында өзгеруі ықтимал дейді.