KAZAKBOL.COM
Ресейдегі бадахшандык мигранттар лидерлерінің бірі, былтыр қараша айында Хорогта өткен наразылық акцияларын қолдап шыққан Амриддин Аловатшоев Тәжікстанға экстрадицияланған. Бұл туралы Азаттықтың тәжік қызметі хабарлады.
Тәжікстанның ішкі істер министрі Рамазон Рахимзоданың айтуынша, Аловатшоев іздеуде жүріп, еліне «өз еркімен келгенде ұсталған». Бірақ мигранттың туыстары оны Ресейде ұстап, Тәжікстанға алып келгенін айтады.
Тәжікстан ІІМ өкілі Шоди Хафиззода Аловатшоевқа қарсы «адамды кепілдікке ұстап, еркіндігін заңсыз шектеу және басқа да қылмыстық әрекеттерге барды» деген айыптар тағылғанын айтады.
«Азия-Плюс» басылымы Тәжікстанның бас прокуроры Юсуф Рахмонға сілтеме жасап, Аловатшоев 12 қаңтарда Ресейдің Белгород қаласында ұсталғанын хабарлады. Оның жақтастары ол ешқашан заңсыз әрекеттерге бармағанын, Ресейдегі бадахшандық жерлестерінің бас көтерер азаматы болғандықтан, әрдайым мигранттарға қолдау көрсетіп келгенін айтады.
Похожие статьи
Аловатшоевтың Таулы Бадахшанда тұратын туыстары одан 11 қаңтардан бері хабар болмағанын жеткізген. Жергілікті ақпарат құралдары оны Ресейде «ұрлап» кеткенін, 13 қаңтарда Тәжікстанға экстрадицияланғанын жаза бастады. Тәжік билігі болса мұны теріске шығарып жатыр.
2021 жылдың 25 қарашасында тәжік күш құрылымы Таулы Бадахшан облысы Шохдар ауылында арнайы операция жүргізіп, онда жергілікті тұрғын Гулбиддин Зиёбеков өлтірілген. Осыдан кейін жүздеген адам Хорог қаласындағы облыстық әкімшілік ғимаратының алдына шығып, Зиёбековті өлтірген милиция қызметкерлерін жазалауды талап еткен. 28 қарашада билік жергілікті тұрғынның өлімі бойынша әділетті тергеу жүргізуге уәде бергеннен кейін, наразылық білдірушілер тараған.
Сол күндері Тәжікстанның Мәскеудегі елшілігіне сол аймақтан шыққан мигранттар көтеріліп, оларға тілектестік білдірген. Олардың арасында Аловатшоев та болғаны хабарланған.
KAZAKBOL.COM