Ресейде тәжік мигранттарына арналған газет шыға бастады

Ресейде 10 мың данамен тәжікстандық мигранттарға арналған «Садои Муходжир» («Мигрант үні») деген жаңа газет шыға бастады.

Басылым негізін қалаушы Гуфрон Ваххобов журналистік зерттеумен көбірек айналысып, Ресейдегі мигранттардың жағдайы туралы мәліметтер жариялап тұруға ниеттеніп жатқанын білдірді.

«Қазір интернетте ақпарат өте көп, бірақ нақты, дұрысы аз. Азаматтар адасып қалып жатыр. Біз расталған мәліметтерді шығарып, олар үшін жауапкершілік аламыз. Қазір газетті айына бір рет тәжік және орыс тілдерінде шығаруды жоспарлап отырмыз», — деді Ваххобов.

Газеттің 20 наурызда жарық көрген санында Ресейде қаза болған тәжікстандықтардың сүйегін отанына жеткізу мәселесі мен олардың отбасына әлеуметтік көмек алу тәртіптері туралы жазылған.

Ваххобов газет тәжікстандық мигранттарға тегін таратылатынын жеткізді.

Осыған дейін Ресейде «Ресейдегі тәжіктер» және «Тәжікстандықтар үні» деген газеттер шығып тұрған. Бірақ соңғы жылдары бұл басылымдар жабылып қалған.

2019 жылдан бері Ресейде «Мигрант үні» деген радио хабар таратып келеді.

centralasian.org