KAZAKBOL.COM
KAZAKBOL.COM
Шымкенттегі халықаралық әуежайда қызметкерлердің жолаушы жүктерін қалай тасымалдайтыны белгілі болды. Бұл туралы Эльмира Теймурова-Мұсаева есімді желі қолданушысы әуежайда орын алған оқиғаның видеосын өз парақшасында бөлісті, деп хабарлайды «NewTimes.kz» ақпараттық агенттігі.
Похожие статьи
«Бүгін, 21 тамызда таңғы сағат 6.30-7.00 шамасында мен Шымкент-Астана бағытындағы ұшақ ішінде отырып, Шымкент-Алматы бағытындағы рейстің жүктері ұшаққа қалай тасымалданатынын байқадым. Неге біздің шабадандарымыз үнемі сырылып немесе бүлініп қала береді десем, Шымкент әуежайында жүктер осылай салынады екен» деп ашынды жолаушы. Мұны көрген желі қолданушылары жазба авторының сөзін қолдап, өздері де сондай жайтқа талай куә болғанын мәлім етті. Тіпті кейбірі бұндай жағдай тек қана Шымкентте орын алмайтынын жеткізген.
«Мұндай көрініс еліміздің барлық әуежайларына тән. Олардың арасында жүктерді ашып, ұрлық жасайтындары бар. Ондайларды жолаушылардың шағымы бойынша жұмыстан қуады да, үнсіз қалады…», «Жолаушыларды тегін тасымалдаса бұл сорақылыққа көнер едік, билеттің құнына тұрарлық сервистік қызмет көрсетілуі тиіс» деп пікір қалдырды қолданушылар.
Жазба авторының жазбасын оқыған әуежай қызметкері бұл оқиғаға қатысты үнсіз қала алмапты. Өзін әуекомпанияның клиенттерге қолдау көрсету орталығының инженерімін деп таныстырған Саодат Юсупходжаева есімді желі қолданушысы жүк тасымалдау жұмыстарын әуекомпаниясы тек тапсырыспен жүзеге асыратынын, оны өзге компания атқаратынын, жүктердің қауіпсіздігіне әуежай жауапты екенін алға тартқан. Сонымен қатар өкіл әуекомпаниясы әуежай қызметіне бұл жайт бойынша тағы да талаппен жүгінетіндігін жеткізген.