KAZAKBOL.COM
Кенжехан Дүйсенбиев. Фото желіден алынды
Бұл туралы журналист өңірдегі NUR.KZ тілшісіне айтып берді.
Шымкенттегі жергілікті арналардың бірінде жұмыс істейтін журналист Кенжехан Дүйсенбиев кең байтақ жері бар Қазақстанда халық саны көбеймей қала ма да деп қатты алаңдайды. Өйткені бала бағу да қаржыны талап етеді.
Похожие статьи
Сонымен қатар небір бойында қайраты бар жігіттер екінші әйел алып, ел демогарфиясын көтеруге дайын тұр. Тек материалдық жағдай мен заң тұрғысындағы шектеу оларға кедергісін тигізіп отыр.
«Қазір не көп, бойдақ қыздар көп. Демографияны, халық санын көтереміз деп шырылдап жатырмыз. Бірақ, ол билік тарапынан ешқандай қолдау тауып жатқан жоқ. Мемлекеттен дүниеге келген әрбір сәбиге берілетін жәрдемақының өзі бір-ақ жыл беріледі де ары қарай тоқтайды. Қазір көп отбасылар бала санын көбейтуде қаржы тапшылығын сезінеді. Өсімдіктер мен асыл тұқымды сиыр, бұқаларға дейін мемлекеттен субсидия беріліп жатыр. Мәселен,әр сиырға 200-500 мың теңге қаржылай көмек алатындар бар. Былайша қарасаң, барлық салаға ақша бөлініп жатыр. Тек адам капиталына бөлінбейді», — деп ашынды журналист.
Қаламгердің пікірінше, екінші әйел алуды заңдастыру арқылы халық санын көбейтуге үлкен жол ашылмақ.
«Бізде екінші әйел алуға заң тұрғысында рұқсат жоқ. Дегенмен жағдайы барлар алып жатқанын өздеріңіз де көріп жүрсіздер. Меніңше тығылып-қашып жүріп басқа әйелге барып, зина жасағаннан гөрі мемлекет екінші әйел алуға заң тұрғысында рұқсат беруі керек. Сонымен қатар бойында қуаты бар кейбір жігіттер екінші әйел алғысы келгенімен материалдық жағдайы жоқ. Себебі шариғатта екі әйелге теңдей қарау керек делінген. Біреуіне үй алып бердің бе, екіншісіне тура солай жасау қажет. Сондықтан да менің ойымша екінші әйел алып, халық санын көбейткісі келетіндерге мемлекеттен субсидия берілсе деймін. Субсидия көлемі шамамен айына 100 мың теңге көлемінде болса, ол тек бала дүниеге келген соң берілуі тиіс деп ойлаймын. Кейін көмек әр балаға тағы 50 мың теңгеден көбейіп отырса деймін. Халық санын көбейту үшін субсидия жағы қарастырылған дұрыс деп ойлаймын», -деп сөзін түйген Кенжехан Дүйсенбиев бұл ұсынысы қолдау тапса, өзі де екінші әйел алуға дайын екенін жеткізді.
KAZAKBOL.COM