KAZAKBOL.COM
Түркіменстанда интернет жылдамдығы күрт баяулап, VPN-қызметтердің барлығы дерлік істемей қалды. Бұл туралы Азаттық радиосы Түркімен қызметінің тілшілері мен дереккөздері хабарлады.
Бұған дейін жұмыс істеп тұрған ақылы VPN-қызметтер бұғатталды, деп хабарлады дереккөз.
Интернет жылдамдығы елдің барлық өңірлерінде күрт баяулаған. Аймақтардың барлығында VPN-қызметтер істемей тұр.
Түркіменстандағы интернет қолданушылар ғаламторға жалғыз ғана провайдер — ұлттық «Түркіментелеком» байланыс операторы арқылы ғана қосыла алады.
«VPN-қызметтерінің бәрі, ақылысы да істемей қалды. Жылдамдық күрт түсіп кетті. Интернеттің мұнша баяу болғанын бірінші мәрте көріп тұрмын», дейді дереккөздердің бірі.
turkmen.news тәуелсіз басылымы 11 сәуірде Түркіменстанда интернетті бұғаттап жатқанын хабарлаған. Басылым VPN-қызметтер істемей қалғанына назар аударған.
Похожие статьи
Кеңсесі Калифорния штатында орналасқан «Cloudflare» интернет қызметі жөніндегі компания Түркіменстанда 10 сәуірде таңертең интернет жылдамдығы күрт төмендегенін анықтады. «Cloudflare Radar» мәліметінше, Түркіменстанда интернет толық дерлік өшірілген.
Компания сайтындағы мәліметке қарағанда, 12 сәуірде Түркіменстанда интернет толықтай дерлік бұғатталған.
Түркіменстан билігі желідегі ақпарат ағынын қатаң бақылауға алған. Елде Facebook, Twitter, Instagram, Вконтакте және Одноклассники секілді әлеуметтік желілердің бұғатталғанына бірнеше жыл болды. Билік тәуелсіз ақпарат құралдарының сайттарын да бұғаттап тастады. Тәуелсіз ақпарат алу үшін түркіменстандықтар VPN қызметтеріне жүгінуге мәжбүр.
«Шекарасыз тілшілер» ұйымы Түркіменстанның бұрынғы президенті Гурбангұлы Бердымұхамедовті 2016 жылы интернетті шектегені үшін «Интернет жауы» тізіміне қосқан.
Cable.co.uk ағылшын басылымының мәліметінше, әлемдегі ең қымбат әрі ең баяу интернет — Түркіменстанда.
KAZAKBOL.COM