Ақтөбеде отбасылы азамат алдап кеткен бойжеткен қазақтың дәстүрімен ұзатылды

KAZAKBOL.COM

Ақтөбедегі аналар үйінде ерекше той өтті. Әжесі анасын, анасы өзін тастап кеткен Женя Арсеньева өмірдегі шын бақытын тапты.

Ол отбасындағы жаман ырымға нүкте қойды деп хабарлайды NUR.KZ тілшісі.

Ақтөбедегі аналар үйінде үлкен той болды. Жігіті тастап кетіп, жүктілік кезінде аналар үйін паналаған 18 жастағы Женя Арсеньева тұрмысқа шықты.

«Біздің отбасымызда жаман ырым бар. Мен кішкентай кезімнен тастанды болып, балалар үйінде тәрбиеленгенмін. Менің анамды да әжем балалар үйіне тастап кеткен. Менің естуімше, әжем де ата-анасынан тастанды сәби болып өскен. Осыны біле тұра  мен алданып қалдым. Бірақ, өзегімді жарып шыққан баламнан бас тартып, тастап кете алмадым. Жалғыз өсіру қиын болса да баламды жанымда қалдыруға бел будым», — дейді Женя Арсеньева.

Женя «Аналар үйіне» өткен жылдың тамызында келді. Оны отбасылы жігіт алдап соғып, бейкүнә қыз одан жүкті болып қалған. «Қанша жыласам да баламды алдырта алған жоқпын, мен балама лайықты ана болуды ғана ойладым», — дейді ол.

Сәтсіз махаббат хикаясынан кейін жаңа жігітпен танысқан Женя өз бақытын тапты. Жігіт отбасы құруға ұсыныс жасап, балаға әке болатынын айтқан. Женя бұл қуанышын анасындай болып кеткен «Аналар үйі» директорына айтады.

Жетім қыздың қуаныш сыйлауды ойлаған «Аналар үйі» директоры Таңсұлу Лақова дүбірлетіп той жасады.

Құда түсу, келін алу рәсімі қазақты салт-дәстүрмен өтті.  Женя Арсеньева мен Михаил Масловтың тойына барлық БАҚ өкілдері шақырылды. Өзгеге үлгі болса екен деп жас қыздың ерлігі айтылды. 8 ай бойы «Аналар үйін» паналаған жас келіншектің 3 айлық Данил есімді ұлы бар. Бүгін бірі балалы, екіншісі әкелі болды.

«Алғаш көрген сәттен-ақ Женя маған ұнап, ғашық болдым. Бала біздің болашағымыз. Оны туғанымдай ұлымдай сүйіп, бар махаббатыммен тәрбиелеймін», — дейді Михил Маслов.

Женя Арсеньева тағы да бала сүйіп, үлкен отбасы болуда арман етіп отыр. «Аналар үйінің» директоры Таңсұлу Лақованың айтуынша, жас отбасы алғашында пәтер жалдап тұрады. Кейін күйеу жігіт меншігіндегі жер теліміне үй салуды жоспарлап қойған.

«Біз ерекше қуанышты өткердік. Қызымыз ұзатылды. Бұл жерге келген жас аналардың әрі қарай жақсы өмір сүруі үшін бар жағдай жасалады. Алдымен, туған әкелеріне хабарласамыз. Олардан күдер үзсе, қыздар танысады, кейін отау құру туралы жоспарласа маған айтып, ол туралы жан-жақты мәлімет жинаймын. Егер жұмысы, тұрмысы, ойы жақсы болса, келісіп, батамды беремін. Женяның тағдыры аяышты. Ол тастандылар династиясын үзіп тұр»,- дейді Таңсұлу Лақова.

Күйеу жігітпен бірге «Аналар үйіне» Женяның енесі де келді. Ол балаларының бақытты болуын тілейді. Сәбиді немересіндей бауырына баспақ. Женяның әкесі қазақ, шешесі орыс ұлтынын болса, Михаилдың анасы қазақ, әкесі орыс.

Айта кетейік,  Ақтөбе қаласындағы «Аналар үйі» 2014 жылы ашылды. Содан бері мұнда 60-тан астам жас ана пана тауып, олардың 60 пайызы отбасымен қайта табысты, ал өзге аналар жұмысқа орналасты.

Мәселен, 2 жас ана «Дипломмен ауылға» бағдарламасы бойынша жұмыс орнын тапты. Тағы екеуі мерзімінен бұрын баспаналы болса, 3 сәби балабақшаға орналастырылды.

Мұнда аналардың біліміне аса үлкен мән беріледі. 11 қыз-келіншек компьютер курсын тәмамдаған. Аспазшы, тігінші болудың қыр-сырын үйренгендер де бар. Ал қазіргі күні мұнда 13 жас ана сәбилерімен бірге тұрып жатыр. Бәрі де жаңа өмір бастап, өз отбасын құруды мақсат етеді.

KAZAKBOL.COM