Елімізде жасы 25-тен асқан қыздар жігіт табу үшін бақсы-балгерлерді жағалап кетті

Алматыда тұратын түркістандық Назерке 25 жасқа толғаннан соң, тұрмыс құрмай қаламын ба деген қорқыныштан қатты депрессияға түскенін айтады.

«Мен бұл депрессияға қалай түсіп кететінімді білмеймін. Жасымның 25-тен асқанын ойласам мазам қашады. Бұл бүгінгі таңда мен үшін ең үлкен проблема. Оқуымды бітіргенмін, жап-жақсы жұмысым бар. Түрім де соншалық ұсқынсыз емес. Бірақ, неге екенін жігітім жоқ. Анам үйге барған сайын, жасымның келгенін, 25-тен кейін мені ешкім алмайтынын жиі айтады. Осыны ойлағаннан, соңғы уақытта елмен араласудан қалдым. Өзіммен-өзім жүргім келеді. Туыстарымның да, таныстарымның да сұрақ астына алғанынан шаршадым», — дейді Назерке.

Оның айтуынша, жиырма бестен асқан таныс қыздарының көбінде осы жағдай. Тіпті бір танысы күйзеліске қатты түсіп кеткені соншалық, түрлі бақсы-балгерлер мен әулиелердің басын жағалап кеткен.

«Жиырма сегізге келіп қалған бір әпкеміз анасы екеуі әулиелердің басын аралап кетті. Қыз әулиеден бастап, ақыр аяғы Алматыдағы Райымбек атаның басына дейін келді. Осыдан кейін тезірек тұрмыс құру туралы көп ойлаймын. Себебі, әкпем сияқты  әке-шешемнің уайымына айналғым келмейді. Менің анам да кейінгі кезде тым ырымшыл болып кетті. Барған тойларынан қалыңдықтың бір затын сұрап алып, тойбастардың тартуын менің бөлмеме әкеліп қояды. Түсінесіз бе, мұның бәрі менің жанымды ауыртады. Қырсыққанда жөні түзу бір жігіт жолықпай-ақ қойды», — дейді амалы таусылған бойжеткен.

«Әке-шешемнің уайымына қарап, өзімді қоярға жер таппаймын» дейтін түркістандық қыздың бар арманы — биылғы күзден қалмай лайықты жігітке тұрмысқа шығу.

«Қашан тұрмысқа шығасың деп сұрау біздің қоғам үшін үйреншікті жағдай ғой. Өзімнің де арманым — бір үйдің түтінін түтету. Қазір маған құрбылармен қыдыру, қызметте карьера қуу деген соншалық маңызды емес. Үйде баламен отырған құрбыларым маған қызыға қараса, мен олардың кішентайларына қызығамын. Шынын айтсам, жалғыздықтан, ешкімнің назар аудармайтынынан шаршап кеттім»,- дейді кейіпкеріміз.

Назерке депреессияға жиі түскендіктен, денсаулығының нашарлап, тыныштандыратын дәрілерді жиі қабылдап кеткенін айтады. Қанша жігіт кездессе де, біреуі де бойжеткенге үйленуге ұсыныс жасамаған. Соңғы кезде ол психолог көмегіне жүгінсем бе деп жүргенін де жасырмады.