Түркіменстанда мектеп оқушылары арасында жаппай төбелес болған

Түркіменстанның Түркіменабад қаласында жергілікті төрт мектептің оқушылары арасында төбелес болған. Бұл жайында аймақтағы Азаттықтың түркімен қызметінің тілшісі хабарлайды.

«Төбелеске отыз шақты жоғары сынып оқушысы қатысқан. № 3, 24 және 26 мектеп оқушылары № 5 орта мектепке барып, жоғары сынып оқушыларын ұрысқа шақырған», -деп тілші куәгердің сөздеріне сілтеме жасап хабарлайды.

Оның сөзінше, жергілікті тұрғындар бірден полиция шақырған. Соның арқасында төбелесті дер кезінде тоқтатқан. Полиция № 5 мектептің төрт оқушысын ұстаған.

Түркіменабад тұрғындары соңғы уақытта жастар арасында төбелестің көбейіп кеткенін айтады. «Оқушылар арасында топ-топқа бөлініп төбелесу қалыпты жағдайға айналып кетті», — дейді мектеп мұғалімінің бірі.

centralasian.org