Атыраулық белсенділер Ноғаев бастаған бір топ адамға күтпеген жерден «сыйлық» жасады (фото)

Фото: abai.kz

Жер реформасы жөніндегі комиссияның кезекті отырысында атыраулық белсенділер облыс әкімі Нұрлан Ноғаев бастаған бір топ адамға «сыйлық» жасады деп хабарлайды Абай.кз порталы.

Халел Досмұхамбетов атындағы университет ғимаратында болған жиында белсенді топтың өкілі Әсел Нұрғазиева көшпелі комиссия мүшелеріне, Атырау облысы әкімі Нұрлан Ноғаевқа, комиссия төрағасы Асқар Исабекұлына және оның орынбасары Жақсылық Үшкемпіровке қамаудағы белсенділер «Талғат Аян мен Макс Боаевқа бостандық» деген жазуы бар жейдешелер табыстады.

Фото: azh.kz

«Мұхтар аға, Мереке аға, замандастарым Мұхтар, Айдос, сіздер комиссияның 25 мүшесі келдіңіздер ғой. Енді Атыраудан тектен текке кетпеңіздер. Осындағы әр қайсысыңыз қолдарыңыздан келсе, жеке талап қойыңыздар. Міндеттеме алыңыздар. Сонда ғана біз комиссияның жұмысына риза боламыз. Сонда ғана балалар ешқайда қашпайды. Ол балалар елдің, жердің қамы үшін шырылдап жүрген жігіттер. Атыраудан кетпей тұрғанда осы комиссияның барлық мүшелері осы екі баланы шығарып алыңыздар. Комиссия жетекшілері, тағы да Атырауға қош келіпсіздер. Енді сіздерге шапан кигізе алмаймыз. Бірақ Макс пен Талғатты қолдап жүрген азаматтар, отыз шақты арнайы футболкалар дайындап едік. Соны алыңыздар», — деді Әсел Нұрғазиева.

Сәуірдің орта шенінде атыраулық белсенділер үкіметтің жерді шетелдіктерге сату мен ұзақ жылға жалға беру туралы бастамасына наразылық білдіріп, Атыраудағы Махамбет-Исатай алаңына жиналған еді. Осыдан кейін облыс басшысы Нұрлан Ноғаев мырзаның өзі де алаңдағы халықтың алдына келіп, басу айтқан-тын.